Actualidade

O Consello da Xunta aprobou na súa reunión de hoxe os proxectos sectoriais de modificación de tres aproveitamentos hidroeléctricos no río Xallas, que se corresponden concretamente co Salto de Novo Castrelo, A Fervenza II e Ponte Olveira II. Estes proxectos están promovidos pola empresa Ferroatlántica. Segundo as previsións que manexa a Xunta, as obras iniciaranse no último trimestre de 2012 e rematarán antes da finalización de 2014.

Co acordo increméntaselle a Ferroatlántica a potencia eléctrica instalada nun total de 19,74 MW e a produción procedente das fontes hidráulicas verase aumentada en 47 GWh/ano, que se sumarán aos 119 GWh/ano que se producen actualmente nestes saltos que se "optimizan".

Dáse a circunstancia de que Ferroatlántica foi protagonista, este mesmo ano, dunha sentencia que a condenou a unha forte indemnización polo secado do Xallas e a morte de milleiros de peixes no seu cauce. Organizacións como Ríos con Vida ou Adega teñen denunciado os reiterados incumprimentos da norma por esta compañía, nomeadamente relativos á falta de respecto do caudal ecolóxico do río. Outra sentencia obrigaba tamén a Ferroatlántica a manter auga constante na catarata de Ézaro, que até entón só levaba auga cando a compañía "abría" o embalse nunha apertura de domingos e festivos con fins turísticos.

Na actualidade, en Galicia hai un total de 74 aproveitamentos hidroeléctricos en explotación, que implican a xeración de 1.737,48 GWh/ano de enerxía.