Especies Naturais

Características: felino de tamaño mediano. Corpo compacto e flexible con extremidades longas e fortes adaptadas para a carreira. Rabo peludo e avultado coa punta roma. Posúe cinco dedos nas extremidades anteriores, con unllas afiadas e ganchudas, e catro nas posteriores. Cabeza redondeada, perfil chato e nariz rosado con pelos escuros que a rodean. Posúe boa visión nocturna e é bo trepador. O pelame é gris polo dorso, cunha liña negra lonxitudinal no lombo, da que parten outras liñas transversais pardas que van desaparecendo cara ó ventre. Ten dúas liñas negras á altura das meixelas. O rabo presenta uns característicos aneis negros, entre 3 e 5 segundo a súa lonxitude. O macho é máis grande que a femia. 

Costumes: adquire a madurez sexual entre os dez e os doce meses. O celo, de decembro a xuño, é iniciado polos machos con duras pelexas entre rivais. O periodo de xestación é de 65-70 días e paren entre os meses de marzo e abril entre a vexetación, en árbores ocas ou en construcións abandonadas. Un só parto no que nacen dúas ou tres crías que se independizan da nai ós catro meses. Animal solitario con tendencia a establecer xerarquías. Aliméntase a base de trilladeiras, furafollas, toupas e coellos.

Distribución: acostuma vivir en fragas, carballeiras ou bosques de ribeira con abundante vexetación. Presente en gran parte de Galicia, aínda que é unha especie escasa na nosa comunidade.